ស្របជាមួយនឹងបច្ចេកវិទ្យា iOS 7 ដែលមានភាពស្រស់ស្អាត និងទាក់ទាញឲ្យអ្នកប្រើ iPhone ស្ទើរតែទាំងអស់ Upgrade ពី iOS 6 ទៅ iOS 7 ដែលក្នុងនោះរួមមាន iPhone 4, 4S, iPad 2 ជាដើម ។ ឧបករណ៍ iOS ស៊េរីមុនៗទាំងនេះ អាចនឹងមានបញ្ហាថ្ម បន្ទាប់ពីលោកអ្នក Upgrade ពីជំនាន់ iOS 5 ឬ iOS 6 ដែលធ្លាប់ដំណើរការស្រួល មក iOS 7 ថ្មី ។ ប្រសិនបើលោកអ្នកកំពុងតែជួបបញ្ហានេះ សូមបន្តអានពីគន្លឹះ និងដំណោះស្រាយដែលនឹងជួយឲ្យ iPhone ឬ iPad លោកអ្នកមិនងាយនឹងខូចថ្ម ឬកុំឲ្យវាឆាប់អស់ថ្មដូចមុនទៀត ។
ដើម្បីដោះស្រាយបញ្ហាថាមពលថ្មមួយនេះ មិនមានអ្វីដែលលោកអ្នកមិនអាចធ្វើបាននោះទេ សូមកាន់ទូរសព្ទក្នុងដៃអ្នក ហើយអានពីគន្លឹះដែលសំបុកអាយធីនឹងបង្ហាញជូន ។
១. បិទ Background App Refresh
ដំណើរការនៅក្នុង iPhone/iPad គឺពឹងផ្អែកលើថាមពលថ្មទាំងស្រុង ។ ប្រសិនបើលោកអ្នកអនុញ្ញាតឲ្យកម្មវិធី Refresh រហូត ទោះលោកអ្នកមិនប្រើក៏ដោយនោះ វាពិតជារឿងដែលខាតបង់មួយ ដែលលោកអ្នកមិនគួរបណ្តោយឲ្យ iPhone/iPad ចំណាយថាមពលថ្មលើកម្មវិធីមិនប្រើឡើយ ។ លោកអ្នកអាចជ្រើសរើសកម្មវិធីណាមួយ ដែលចង់ឲ្យ Refresh រហូតដែលអាចឲ្យលោកអ្នកទទួលបានការជូនដំណឹង ឬឲ្យកម្មវិធីបន្តដំណើរការ ផ្ទុយទៅវិញ បើលោកអ្នកគិតថាមិនសូវជាសំខាន់ សូមបិទត្រង់ចំណុច Background App Refresh នេះចោលតែម្តង ។
២. បិទកម្មវិធីស្វែងរកទីតាំង (Location-Tracking)
កម្មវិធីជាច្រើនដូចជា Google Maps និង Twitter រួមទាំងកាមេរ៉ា iOS តែងតែស្វែងរក ចាប់យកទីតាំងដែលលោកអ្នកកំពុងថតរូប ឬប្រើ Twitter ។ លោកអ្នកអាចបិទកម្មវិធីណាមួយដែលលោកអ្នកគិតថា មិនចង់ឲ្យចំណាយថាមពល និង Wifi ដើម្បីចាប់យកទីតាំងណាមួយ ឬអាចបិទ Location Services ទាំងអស់ក៏បាន ។ ដើម្បីបិទសូមចូលទៅកាន់ Settings > Privacy > Location Services ។
៣. បិទ AirDrop
AirDrop ជាកម្មវិធីពិសេសមួយអនុញ្ញាតឲ្យលោកអ្នកចែករំលែក Files ជាមួយអ្នកប្រើប្រាស់ផ្សេងទៀត ដែលនៅលើបណ្តាញតែមួយ ។ ប្រសិនបើលោកអ្នកលែងប្រើ បន្ទាប់ពីចែករំលែករួច សូមកុំភ្លេចបិទវាផង ដែល AirDrop តម្រូវប្រើ Bluetooth ដែលចំណាយថាមពលថ្មមួយចំនួនផងដែរ ។៤. បន្ថយពន្លឺអេក្រង់
អ្នកប្រើប្រាស់ភាគច្រើនបានដឹងចំណុចនេះ ដែលការបន្ថយពន្លឺអេក្រង់អាចកុំឲ្យឧបករណ៍ iOS មិនចំណាយថាមពលច្រើន និងកុំឲ្យប៉ះពាល់ដល់ភ្នែកផងដែរ ។ សូមកុំរំលងចំណុចនេះ ប្រសិនបើ iPhone (ជាពិសេស iaPad) ត្រូវបានប្រើដោយក្មេងៗ ដែលភាគច្រើនពូកគេចូលចិត្តសម្លឹងមើលជិត ហើយបើមានពន្លឺជះមកខ្លាំងទៀត នោះប្រាកដណាស់ថាវាប៉ះពាល់ដល់ភ្នែក ដោយផ្ទាល់ ។ លោកអ្នកអាចកំណត់ពន្លឺស្វ័យប្រវត្តិ ដែលវានឹងអាស្រ័យលើបរិស្ថានពន្លឺនៅជុំវិញលោកអ្នក ដោយចូលទៅកំណត់នៅ Settings > Wallpapers & Brightness ។៥. ស្វែងរកជាមួយ Spotlight
បច្ចេកទេសស្វែងរកឯកសាររបស់ iOS 7 លើឧបករណ៍ iOS ដែលលោកអ្នកអាចស្វែងរកឯកសារណាមួយ ដោយគ្រាន់តែទាញចុះមកក្រោម នោះវានឹងលោតបង្ហាញប្រអប់ស្វែងរកចេញមក ដែលគេហៅថា Spotlight ។ ពេលដែលលោកអ្នកវាយស្វែងរក វានឹងបង្ហាញទិន្នន័យមកពីច្រើនចំណាត់ថ្នាក់ ដូចជាបង្ហាញទិន្នន័យទាក់ទងនឹង Applicatiom, Contacts, Music ជាដើម ។ សូមដកធីកចេញពីចំណាត់ថ្នាក់មួយណា ដែលលោកអ្នកមិនសូវធ្វើការស្វែងរក ដើម្បីឲ្យចំណេញពេលវេលាផង និងចំណាយថាមពលថ្មច្រើនផង ។ លោកអ្នកអាចចូលទៅកំណត់នៅ Settings > General > Spotlight ។
ជាការពិតណាស់ នៅពេលដែលលោកអ្នកចំណាយថាមពលថ្មច្រើនជាប្រចាំ នោះ iPhone/iPad លោកអ្នកនឹងកាន់តែខ្សោយសមត្ថភាពបន្តិចម្តងៗ រហូតដល់ឆាប់ខូច ។ សូមថែទាំការប្រើប្រាស់ទូរសព្ទនានា ជាពិសេសថ្ម ឲ្យមានអាយុកាលបានយូរ វាក៏ជាផ្នែកមួយសម្រាប់លោកអ្នក ក្នុងការសន្សំសំចៃប្រាក់កាសផងដែរ ។
ប្រភពពី ៖ សំបុកអាយធី
0 comments:
Post a Comment